لقراءة الجزء الثاني - أضغط هنا
سلسلة مقالات مخاميخ لتربية الأطفال.
والمرة دي هنتكلم عن العقااااااااااب.
- أيوه بقى...أيوه بقى...عمال تقولي دبدوب وأرنوب...ما فيش غير الشبشوب.
- إيه ده يا أستاذة ناريمان...أنتي كده بقيتي فتاكات؟.
- ألحق يا أستاذ محسن...هتضرب الولد بالشبشوب؟.
- لا، لا، عيب ما يصحش...شبشوب إيه؟ الكرباج يا عثمان !
- يا عم محسن أنت كمان...مالك قلبت على زكي رستم كده ليه؟
خلونا نكمل خطة الشرنقة للسيطرة على الأطفال بخيوط الحرير.
وهندخل على النقطة ج
الثواب والعقاب بأسلوب الحسنات والسيئات.
كل ما الولد أو البنت يعملوا حاجة حلوة ياخدوا حسنة.
الحسنة دي تبقى ورقة ملونة على شكل مثلث أو مربع...تبقى ربع جنية مخروم. اللي يطلع من ذمتك يا أستاذة ناريمان.
وبكده تبقى جبرت وأتعشينا...فضل وعدل.
قصدي كل ما الطفل يجمع مجموعة حسنات...تتحول لمبلغ نقدي...يقدر يعمل بيه اللي هو عايزه.
والأفضل تجيبي له حاجة يحط فيها الحسنات....حصالة...أو علبة قديمة تلونيها و تزينيها.
وبعدين لما ينام...تخوشي تقلبي الولد وتكسري الحصالة وتتغني بقى.
مثلا لو حفظ سورة من القرآن ياخود حسنة.
راح صلى مع باباه ... من غير ما يقلب المسجد إلى ساحة حرب... ياخود حسنة.
شرب اللبن وغسل سنانه ونام بدري ياخود حسنة.
طلع من الاوائل على الفصل ...وهكذا.
وكل مثلا 10 أو 20 حسنة يعملوا عشرة جنية...أو حسب الحالة المادية للأسرة.
لو الأسرة غنية...يا ريت تكفلوني وأنا متربي جاهز...مش هتتعبوا في حاجة
نقدر كمان نستفيد من موضوع الحسنات...إننا نعلم الطفل إزاي يحدد هدف ويسعى لتحقيقه.
يعني يبقى عارف هو بيحوش مجموعة الحسنات دي ليه...؟
تروحوا مع بعض زي الشاطرين ...وتحددوا لعبة أو كتاب أو أي حاجة حلوة بيحبها.
ويبقى في دماغه إنه بيجمع حسنات علشان يشتريها.
طيب فين الجانب الجميل في النقطة دي.
العقاب يا معلمي؟
ده أنت هتشركي الولد يا أستاذة ناريمان...اتقلي تاخدي حاجة نضيفة.
يعمل حاجة وحشة
الأول نديلوا إنذار إننا هنشيل منه حسنة.
فضل مغلس شيلي الحسنة فعلا.
وطالما وصلتي لمستوى شيل الحسنة...يبقى ما ترجعش.
يتحايل...يعيط...سيبيه...بعد ما تعرفيه غلط في إيه.
يتعلم إنه يعتذر ويوعد إنه يبقى كويس المرة الجاية...بدل ما تبطحيه...قصدي علشان ياخود حسنة جديدة.
علشان كده...لما تهددي بشيل الحسنة.
تبقى حاجة تستاهل إنك تشيلي علشانها الحسنة.
لأن لو قعدتي تقولي هشيل الحسنة وترجعي في كلامك.
الوسيلة هتفقد معناها.
والطفل هيعرف إنه بشوية محايلة هيعرف يرجع الحسنة.
لازم يعرف إنها مش بترجع غير بالاعتذار وإنه يعمل عمل كويس المرة الجاية.
القاعدة الرئيسية: العقاب بالخصم من الحسنات للحاجات الكبيرة.
عندك وسائل عقاب للحاجات الخفيفة...زي ما فيش أرنوب النهاردة...ما فيش لعبة الملك والغفير...وهكذا.
لأنه من المهم إنك ما تحرقيش عليه الحسنات عمال على بطال.
لازم يحس إنها هدف ممكن يوصل له.
خصوصا في المرة الأولى.
يعني طنشي في المرة الأولى بالذات.
علشان ما يزهقش من اللعبة...ويحس إنها عمرها ما هتتحقق.
خليه يحس حلاوتها مرة ولا اتنين.
وبعدها فين يوجعك بقى يا معلمي !
هو هيبقى زي المدمن.
تقدري تاخديه على كشك عم حسونة وتجيبي له الصنف...فيه تخفيضات بمناسبة بداية العام الدراسي.
الطفل وصل لنقطة إن بقى عنده لعب.
في الحالة دي ... ممكن تعاقبيه إنه يتشال منه لعبة...لمدة محددة.
وممكن تخليه هو اللي يختار اللعبة اللي هتتشال...علشان يعرف يقدر حجم غلطه.
ومثلا لو قولتي لهم شيلوا اللعب قبل ما يناموا.
وبعدين نفضوا لسموك...وناموا من غير ما يشيلوا لعبهم...من على الأرض.
تتشال اللعب لمدة يوم ولا حاجة.
وما ياخدوهاش غير لما يعتذروا تاني يوم...وبعد ما يوعدوا إنهم ما يعملوش كده تاني.
مهم إنك تعلميهم النظام.
زي إنهم يشيلوا لعبهم في مكان محدد...
يبقى فيه صندوق بلاستيك بتتحط فيه اللعب...أو كارتونة فاضية...أو جزء من الدولاب.
لازم تعوديهم على النظام....ومعك وسائل تحفيز وعقاب في إيدك.
دي وسيلة تحفيز وتعليم وعقاب.
بس محتاجين وسيلة أشد شوية ... بس برضو من غير إيذاء وصراخ ووجع قلب.
نعمل إيه؟
نتكلم عن الموضوع ده في المقالة الجاية إن شاء الله.
تابعونا على الفيسبوك - صفحة مخاميخ
لقراءة الجزء الأول - أضغط هنا
صحيتي الأولاد من النوم خلاص؟
حرام عليك يا شيخة...حد يصحي أطفال بدري كده...هم رايحين يبيعوا لبن؟
اتكلمنا المرة اللي فاتت.
إن تربية الأطفال تتلخص في إننا نربي نفسنا.
ننام بدري ونصحى بدري.
وأنهم نسخة من تصرفاتنا.
بالظبط زي الروبوت اللي عنده كاميرات وأجهزة تنصت.
وهيرجع يعرض كل الكلام والأفعال اللي لقطها.
يبقى إيه الحل؟
ترجع الروبوت التوكيل...وتجيب بداله توكتوك أفيد.
شوفوا بقى يا جماعة
الأولاد بيتعلموا من اللعب...مش من أي حاجة تانية.
يعني ابنكم أو بنتكم مش ضابط صاعقة مظلات...عايزينه ينفذ أوامركم.
كمان الأطفال بيملوا...وبيزهقوا من الروتين.
فلازم تبتكروا.
مثلا الفطار
طبق البيض اللي حضرتك هتعمليه...تقدري تخلي الطفل يطير به من الفرح !
بدل ما حضرتك تُغزي الواد بالسكينة اللي في إيدك...علشان يفطر.
تقوم السكينة تتعاص دم بقى...ومش بعيد السجادة الغالية تبوظ.
وهي الحاجة الوحيدة اللي طلعت بها من الجوازة دي ياختشي !
حضرتك أسهل وأوفر وألطف...إنك بشوية حركات سريعة ماهرة.
تعملي البيض على شكل أرنوب.
ما فيش عندكم بيض؟
ممكن بالبطاطس المهروسة...تعملي بطة أو وزة.
وتحطي لها جناحات من الخس...ومنقار جزر..وعيون زيتون..اللي تجودي به.
البطاطس غالية؟
طب بالجبنة...وبدل ما تدفسي الجبنة والزيتون في الرغيف كأنك بتحضري صابع ديناميت.
حطي الزيتون كأنه عيون...وشريحة جزر كأنها مناخير الأرنب...وشوية بقدونس...كأنها شنب.
ويا جمالو...يا حركاتو...يا تاكاتو
الواد...؟
خلي بالك منه.
قصدي وهو بياكل تلاعبيه: أنت أكلت ودان الأرنوب...آي آي...سيب وداني.
نفذي بس القصة دي وقولي لي النتائج.
طب إيه فائدة القصة دي؟
الطفل لو اتعلق بالأشكال اللي أنتي بتعمليها بالأكل...يبقى كده نجحنا في خطة الشرنقة !
وهي خطة للسيطرة على الأطفال...بخيوط الحرير...من بطولة دودة القز !
أيوه حضرتك...أولياء الأمور بيبتدوا تربية الأطفال كدودة...ونتمنى ينتهوا كفراشة.
ما حدش يرش مبيد على الموضوع يا جدعان.
وبكده هيبقى معك ورقة تفاوضية عظيمة مع الطفل.
كل يوم الصبح تزقزقي زي العصفورة الرقيقة:
مين هيقوم من النوم يا ولاد علشان أعمله أرنوب؟
مين هيعمل مش عارف إيه...علشان الأرنوب؟
وتفضلي كده كل يوم.
لحد ما الأولاد يبدأوا يطبطوا عليكي.
وأهلك يتصلوا بالعباسية...علشان يلحقوا حالتك اللي اتدهورت.
وأنتي تفضلي مصرة: الأرنوب...الأرنوب.
يا ضنايا يا بنتشي...كانت زي الفل يا خواتشي...لحد ما بدأت تقرا البتاعة اللي اسمها مخاميخ دي !
ندخل بقى على الخطوة ب من خطة الشرنقة.
قولنا الأطفال بيستجيبوا للعب...وبيتعلموا باللعب.
يبقى لازم نفكر في لعبة يتنافسوا من خلالها.
نلعب مثلا لعبة الملك والأمير والوزير والغفير.
وحسب عدد أفراد الأسرة زودي مراكز.
مين اللي هيخلص أكله الأول علشان يبقى الملك؟
مين اللي هيغسل سنانه الأول علشان يبقى الملك؟
ولما حد ينجح ويبقى الملك...لازم تهللوا له...وهييييييييه وبرافوا.
وتصقفوا للأمير كمان...مش الملك بس.
وطبعا حضرتك وزوجك تقعدوا فترة تتبادلوا دول الوزير والغفير.
وتعملوا إنكم زعلانيين إنكم الوزير و الغفير.
لو الأولاد بدأو يعيطوا ويزعلوا... علشان مش بيطلعوا الملك في اللعبة.
تفهميهم إن الهدف من اللعب هو الاستمتاع.
اللي هيغلس أو ينكد...مش هنلعب اللعبة دي تاني.
وممكن تحرميهم منها يوم ولا حاجة.
ولما حد يقول أنا الملك وقت العقوبة.
تقولي له: لا اللعبة موقوفة وما فيش ملك.
ومش هوصيكي ..تتكلمي بهدوء طبعا..بلاش استخدام الكرباج في المرحلة دي.
ومن خلال اللعبة...تقدري تعلميهم قيم كتير ...زي:
إنه مش مهم يخلص الأول والسلام.
بس الأهم إنه يعمل مهمته بدقة وإخلاص...يعمل الصح يعني.
والمرة الجاية يقدر يحسن من مستواه ويبقى الملك.
ومثلا إنه بلاش يغش علشان يبقى الملك.
الفوز باللقب مش هيفرق لو أنت غشيت.
وتعرفيه إن حبيبنا رسول الله - عليه الصلاة والسلام - قال: من غشنا فليس منا.
وعلشان تتأكدي إن الأطفال نفذوا الكلام...ممكن تعملي لهم اختبار منشطات بنهاية كل مسابقة !
وهنا صفر الحكم بنهاية الشوط الثاني من مباراة تربية الأطفال
بين الأستاذة ناريمان وأولادها الابرياء المفترسين.
نكمل باقي الموضوع في مقالات تانية إن شاء الله.
--------
ممكن نعمل مسابقة لأفضل سندوتش فطار.
صوري السندوتش أو طبق الفطار...وأبعتيه وأنا أنشره.
وبعد أسبوع مثلا...الصورة اللي هتاخود أكتر لايك وشير وتعليقات.
نعلن عن صاحبته كالأم المثالية ... قطاع السندوتشات !
واحد كبده كمالة هنا يا بني الله يكرمك
اللي موافق على الفكرة يقولي.
(تم تنفيذ المسابقة على صفحة الفيسبوك)
لقراءة الجزء الثالث - أضغط هنا
تابعونا على الفيسبوك - صفحة مخاميخ
نفسك ابنك يوصل لمستوى زويل العلمي؟ طب نفسك يبقى الشيخ المنشاوي؟
طب عايزه بنتك تبقى نموذج للأخلاق والجمال والذكاء...وتبطل تعض في الأطفال وتبطل تقطع في شعرها؟
نفسك؟
طب هاتوا ورقة وقلم...وأكتبوا ورايا الوصفة دي:
عدد واحد عضاضة بالكهرباء.
عدد اتنين ماكينة صراخ عالية الديسيبل.
عدد واحد خرزانة سوداني معتبرة.
وما فيش مانع من عدد واحد شومة من بتاعت إنسان الكهف...أيوه اللي هي فيها بزابيز دي.
وكمان عدد واحد بلاي استيشن.
وفوق ده كله...واحد تليفزيون عليه قنوات كارتون.
حط ابنك ولا بنتك في شقة مساحتها مترين في مترين.
وقلب كويس مع الحاجات اللي فوق دي.
وخود وحش مفترس بعد كام سنة.
أحنا بنربي وحوش ممسوخة يا جدعان.
إيه العيال المطلوقين علينا في الشوارع دول؟
أولا علشان ما نزعلش مع بعض.
أنسوا بقى خالص قصة الطفل المصري أذكي طفل في العالم والهري ده كله.
أحب أقولكم إن حتى لو كان أذكي طفل في العالم ونزل تحت مقصلة العته اللي عندنا اللي اسمه زورا التعليم...والهطل اللي في التلفزيونات...هيطلع حمار حصاوي معتبر.
عايزين تعرفوا يعني إيه تربية طفل؟
"أسكت يا واد...أسكتي يا بت...كوبة تاخودكم أنتم و..."
كوبة تاخودهم هم ولوكو يا أستاذة ناريمان.
أبوهم أصلا في الكوبة اللي اسمها شركة وطالع عينه.
لا حقيقي.
تخيل معايا كده...إنك فتحت باب شقتك الصبح ... لقيت حماتك.
قصدي لقيت روبوت صغير بكاميرات وأجهزة تنصت.
ماشي يسجل كل حاجة حواليه...وبيرجع يعرضها تاني.
هااااار أسود
تخيل بقى لو معك البتاع ده في البيت؟
هتقعدوا تشدوا في شعر بعض...وتقعدوا تصرخوا؟
طب هتقعدوا تسمعوا أوكا وأورتيجا؟
تربية طفل يعني تربي نفسك معه.
حطوا الجملة دي حلقة في ودانكم.
أي والله...هي كده بالظبط.
عايزه يغسل سنانه؟ أغسل أنت سنانك الأول يا جميل !
عايزه يصلي؟ لازم تعوده يروح معك المسجد يا عسل.
عايزه يقول بابي ومامي؟
ابعته الصين هيظبطوه ويرجعهولك بيقول الأذان كمان.
الموضوع طويل فخلونا ناخود نقطة كنموذج في طريقة التعامل مع الأطفال...ونبقى نكمل الباقي في مقالات تانية إن شاء الله.
إيه رأيكم تصحوا الأولاد الصبح وياكلوا فطارهم ويلبسوا وينزلوا المدرسة من غير أي وش وصداع؟
دي عملية تربوية يا أستاذة ناريمان...ناوليني الخرزانة السوداني !
في تعاملك مع الأطفال ممكن تتعامل معهم زي طرزان في الأدغال.
فيه أطفال بتخاف وتستجيب للشخط والنطر.
وفيه أطفال هيحصل لها صدمة عصبية ومش هتستجيب ولو دبحتهم.
وده بجد مش مبالغة.
وفي كلتا الحالتين...أنت هتخسر الطفل.
لإما هيطلع ضعيف الشخصية..أي حد يضربه على قفاه ويسكت ويستجيب.
لإما هيطلع إنسان بارد وجبلة وما بيحسش...ومش بعيد يطلع معقد نفسيا.
أنتوا مش حاسين إن النوعين دول كتروا قوي في بلدنا؟
ما هو من أفعالكم... هو يعني إحنا بنستورد بني آدمين !
والغالي عندكم.
بلاش الناس اللي بتتجنن وتربط الأولاد وتكتفهم.
أو الناس اللي بتلسع العيال بالنار...أسوأ شيء ممكن يتعمل في الحياة.
أوعوا الإيذاء الجسدي...وبلاش الصراخ والجنان ده كله.
غير إنك هتكسر الطفل...أنت كمان هيجيلك شلل رباعي وانهيار عصبي.
ومش هتوصل لنتيجة.
رغم إنه من السهل قوي تنجح بطرق أهدى وألذ.
لازم تعرف وتفتكر طول الوقت إن دول أمانة ربنا بعتها لك.
وهتتسأل عنها...دورك إنك تحسن إليهم وتستثمر فيهم.
علشان لما تسيب الدنيا...تلاقي ولد صالح يدعي لك.
وبعدين تفرح إنك عملت إنجاز عظيم...وهو إنك بنيت إنسان !
ألا هو يعني إيه إنسان؟
خلونا نبدأ بمثال الصحيان للمدرسة الصبح.
برمج نفسك.
قبل ما تفتح باب الغرفة بتاعتهم...غمض عينك...تاكل ملبن.
تخيل صورتهم وهم بيضحكوا...خود نفس...أفتح عينك.
بعدين قول بسم الله...وأدخل عليهم بهدوء وقول السلام عليكم.
أرجع لأيام زمان لما كنت طفل...عمرك ما كنت طفل؟
يا عم افتكر بس ... أكيد كنت طفل زي ما كلنا كنا أطفال.
فتحت الباب؟
إيه رأيك...ملائكة نايمين...فلذات أكبادنا التي تمشي على الأرض.
ينصر دينك يا أستاذ نفيسة.
أوقفي جنب السرير...قولي لهم بالراحة: أصحوا يا كتاكيت...الشمس طلعت...مين هيسبق الشمس؟
طبعا هيطنشوك ولا كأنك موجودة.
مددي جنبهم على السرير ونامي.
أنت شقيانة يا ختشي...فيسبوك وتويتر لحد ما ضوافرك تعبتك.
قصدي أعملي إنك نايمة.
وسمعيهم كأنك بتشخري.
مش بتعرفي تشخري؟
طب سجلي شخير محسن حبيبنا وشغليه للولاد على الموبايل.
لا حقيقي حاولي تحسسيهم إنك أنت كمان نايمة.
وحسسيهم إنك بتلعبي.
لما حد يتحرك تقعدي تعملي كأن فيه حد بيحصيك وأنت مش عايزه تصحي.
أو كأن فيه عنكبوت ماشي على السرير...وتمسكي رجل العنكبوت وإيده.
وتعملي كأنك مخضوضة...وتقولي: لا...ده فلان...مش عنكبوت.
بس بلاش تعلي الخضة...أحسن العيال يتصرعوا.
شوية وهيستجيبوا معكي.
لو حصل وما استجابوش.
يبقى العيال ولادك مدمنين يا مدام...لازم تشوفي بيسهروا مع مين؟
القصة كلها تتلخص في إن نظام البيت كله لازم يتغير.
لازم البيت كله ينام بدري...ويصحى بدري.
ما هو الشمس والقمر دول مش عمالين يلفوا على الفاضي؟
بيلفوا علشان يبقى فيه نهار نصحى فيه...وليل ننام فيه.
تقوم الحياة تمشي سليمة.
لا الأولاد هيبقوا تعبانين...ولا أنتم هتبقوا تعبانين.
والأولاد هيصحوا يضحكوا.
لازم الأولاد يبقوا عارفين إنهم هيصحوا لحاجة أحلى من النوم.
وده يجرنا بقى لباقي الحاجات بتاعت الصحيان الصبح.
غسيل الوش...غسيل الأسنان...اللبس...الفطار...المطواة والألغام...قصدي الشنطة والسندوتشات.
إزاي نكمل تربية الأولاد...وإزاي نوصل لبر الأمان؟
نكمل بقى في مقالات تانية إن شاء الله...علشان أنتم عاملين دايت ونفسكم بيتقطع بسرعة من القراءة.
----------
ملاحظة: الفضل الأول في مقالات الأطفال...لزوجتنا المصونة أكرمها الله... اللي كانت بتقعد تقرا وتفهم وتحاول تطبق...جزاها الله كل خير.
أنا بحاول أعرض الكلام ده بشكل مخاميخي.
وساعات كنت ببدع...يعني موضوع العنكبوت ده من اختراعي !
لقراءة الجزء الثاني - أضغط هنا
تابعونا على الفيسبوك - صفحة مخاميخ
المرة دي هنتكلم عن مشكلة المشاكل ونقطة ضعف خط دفاع الزمالك.
قصدي الثغرة اللي بتدمر كثير من العلاقات...مهما كان مستوى الحب.
وهي الغضب.
الغضب حماقة يا حورية.
المشكلة إن معظمنا ما يعرفش عن الغضب غير الشخصية الكارتونية أبو الغضب بتاع مازنجر.
لكن ابنه اللي هو الاستاذ غضب...ما نعرفش عنه حاجة.
صح؟
بصي يا أستاذة ناريمان...بص يا أستاذ محسن.
أوعو تغلطوا في بعض وقت الغضب...أوعو.
أومال نعمل إيه؟ نعمل كوبايتين شاي مثلا؟
لا لا...الأول خودو القصة الجاية دي.
وبعدين تعالوا بعدها نحكي عن الغضب ونعمل إيه وقتها؟
القصة دي...كانت قصة لطيفة قرأتها زمان...لكن طبعا هنعرضها بالطريقة المخموخية مع كثير من الإضافات اللذيذة وبالهناء والشفاء.
-------------
مرة كان فيه واد بيتنرفز...ويقال إنه كان بيشيل مطواة ويشرح أي حد يقابله.
أبوه الحكيم كان قاعد على القهوة وماسك الشيشة...توقف لثواني عن الرضاعة وقال: يا بني أنت كل ما تتنرفز...تقوم متخانق...كده ما يصحش.
الواد: أعمل إيه بس يا أبا؟ ما الناس بقت خنيقة وحاجة تشل؟
الأب: بص يا بني...أنا هقولك على طريقة علشان تتخلص من الغضب.
الابن الصايع البار: أنت تؤمر يا حاج.
الأب: كل لما تغضب...روح لعمك حودة النجار...خود من عنده شاكوش وكام مسمار...أطلع على سور الجنينة بتاع محمود بيه.
ورشق المسامير في السور بكل قوتك لحد ما تحس إن الغضب راح.
الابن: أنت عامل فردة على محمود بيه ولا إيه؟ وبتشتغلني وعايزني أبقى طرف في الحدوتة؟
الأب: لا يا بني ما تقولش كده عيب...أبوك رجل يفهم في الأصول. أعمل انت بس كده وتعال لي بعدها.
الواد يا دوبك مشي خطوتين...حصلت مشكلة...كلمة في التانية بقت حكاية...الواد غضب...وكان هيقطع العيال.
بس أفتكر نصيحة أبوه...راح جاب المسامير والشاكوش...ورشق السور بتاع محمود بيه بالمسامير...لحد ما الخشب بقى تقريبا مصفح.
تعب الواد وعرق وزهق...بس غضبه راح فعلا ... ومن غير ما يأذي حد ... غير محمود بيه اللي عنده فلوس كتير ومش هتفرق معه.
المهم الواد رجع على أبوه...
الأب: شكلك أخدت بنصيحتي؟
الابن: أيوه يابا.
الأب: طب إيه الأخبار؟
الابن: زي الأهرام يا حاج...الاتنين بيطبلوا للحكومة.
الأب: قول يا بن التعبانة...إيه الأخبار...الناس زهقت من الرغي ده كله !
الابن: بصراحة يا حاج...كلامك طلع صح...وبدل ما أشرح حد...النتيجة طلعت ميه ميه...والغضب راح بعيد.
وحسيت إن كل الناس مسافرة وهي قريبة مني...كل الناس في غربة وأنا مين هيسأل عني !
الأب: جميل يا البرنس...بص بقى يا بني.
لما تغضب تاني.
روح لعم حودة النجار...خود كماشة منه.
وروح أخلع كل المسامير اللي دقتها في السور الخشب.
الواد وشه أحمر وغضب وكان هيغز أبوه...بس مسك نفسه ونفذ النصيحة. راح جاب كماشة وقعد يخلع كل المسامير لحد ما تعب.
لكن الغضب من النفخ بتاع أبوه...راح بعيد.
الواد رجع لأبوه بينهج...وقال: ها يا حاج القرش اللي ضاربة لسه عالي معك وهتفتكس حوار جديد؟
الأب خبط على كتف ابنه...قام معه لحد السور...وقال بكل حكمة السنين...:
شايف يا بني المسامير سايبه فتحات إزاي في السور ؟!
هي دي نتيجة الغضب يا بني ...مهما عملت عمر الفتحات دي ما هتروح من نفسويت الإنسان اللي أنت مسحت بكرامته الأرض لما كنت غضبان.
الابن متأثرا: تصدق يا حاج أنت من ساعة ما طلعت على المعاش وأنت شكلك بقيت فاضي...ما تقول كده من الأول وأرحم أمي العيانة !
عموما تشكر على النصيحة يا حاج.
-------------------
أظن اللي كتب القصة...لو قرأها بالطريقة دي هينتحر.
لكن معلهش...لازم نتماشى مع العصر.
ما تغنوا معايا أيوه أيوه...ما تقولوا ورايا...أيوه أيوه
عبده موتة ... أيوه أيوه...
إحم إحم..نرجع تاني لموضوعنا.
من الحاجات اللي بننساها وقت الغضب إننا بنحب بعض...بنبقى عايزين نأذي بعض لأقصى درجة.
ويا سلام بقى لو الهبل وصل لمرحلة مد الإيد...تبقى الخيبة الكبيرة يا عمي والعالم كتيرة.
والأسوأ إن الغضب يشتغل في وجود حد غريب.
وخلو المعلومة دي حلقة في ودانكم: أي حد براكم أنتم الاتنين...يبقى غريب !
لازم نعرف إن الغضب زي المسامير ... هيخرم الجدران الرقيقة اللي جمعاكم سوا.
مش هينفع فيها لا معجون ولا سيبداج.
أمنعوا الغضب قبل ما توصلوا له.
يا ريت زي ما قولنا قبل كده.
ما تنسوش الجلسة الأسبوعية...الساعة بتاعت الرغي مع بعض...اللي بتفلتر حاجات كتير.
طب لو حصل...وغضبنا !
أذكروا الله.
قول بسم الله يا محسن.
استعيذي بالله من الشيطان الرجيم يا ناريمان.
خود نفس عميق وفكر في حاجة تانية.
لو قاعد أوقف...ولو واقف أقعد...غير مكانك وغير حالتك.
يقدر الواحد يتوضى أو ياخود دوش.
يقدر يصلي ركعتين.
يروح يقعد في غرفة لوحده شويتين.
بس يا ريت نقدر رغبة بعض في عدم الكلام في اللحظة دي.
بلاش تطلعوا ضغط الحياة على بعض.
افتكروا إن الكلام اللي هيتقال وقت الغضب...مش بيعبر عن اللي جواكم...لكن نسيانه ما بيبقاش سهل.
أفتكروا حديث الرسول عليه الصلاة والسلام:
ليس الشديد بالصُّرَعة ـ بضم الصاد، وفتح الراء ـ إنما الشديد الذي يَملك نفسه عند الغضب.
يعني عضلات كرشك مش هي محل قوتك يا سيد محسن.
ولا الإطباق وباقي عدة المطبخ هي مكمن قوتك يا أخت ناريمان.
كلمة السر في حل مشكلة الغضب.
إنكم ما توصلش لمرحلة الغضب أصلا.
ولو حصل...كل واحد يتحكم في نفسه ويخليه قوي.
وأبعدوا عن بعض شوية.
فوتوا اللحظة دي.
علشان خاطر لوكو وشاهيناز...ما يخافوش ويكرهوا فكرة الزواج !
-------
المقال ده مفروض يبقى برعاية السبكي ! :D
"نفسي أبطل تدخين يا أخي ومش عارف"
كام مرة قولت الجملة دي؟
طب إيه رأيك لو دردشت معك شوية لحد ما تبطل سجائر !
هعمل إيه؟
هقعد أكتب لحد ما أزهقك وأخليك تخلص علبة السجائر وتكره اليوم اللي شوفت فيه المقالة والسجائر مع بعض
استنى طب ما تزعلش...خود السيجارة دي وعفر.
هو أحنا قاعدين في بنزينة ؟!
بص يا سيدي...هو أنت بتدخن ليه؟
زهق مش كده !
أنت عارف إيه مشكلة السجائر؟
إنها معك في كل وقت.
تفرح تدخن...تحزن تدخن.
الأهلي يكسب تدخن...الزمالك يتهرس كالعادة تدخن.
هي الصرخة اللي أنت عايز تطلعها من جواك علشان تتخلص من الزهق والقرف.
بس للأسف...مع الوقت بتتحول السيجارة للزهق والقرف نفسه.
مصيبة بعيد عنك...طب والحل؟
السجائر ومن خلال الخبرات العملية...عبارة عن تعود.
هتقولي نيكوتين وإدمان وخلافه...سيبك من الهري ده كله.
طب إيه رأيك نجرب اللاصقة بتاعت النيكوتين؟
جرب...
بس القصة كلها إنك لازم توصل لنقطة إنك تجهز نفسيا علشان تبطل السجائر.
ولو جهزت نفسيا...ما فيش حاجة هتوقف قصادك.
ثني مد...هوب فوق.
إيه يا عم ده...هو أحنا داخلين الأوليمبيات ؟!
بقولك تجهز نفسيا.
يا سيدي سيب أنبوبة البوتاجاز...مش هناخود أنفاس أصلنا.
بقول نفسيا مش نفاسيا.
أنت عارف إن التبطيل قرار.
طب لما أنت عارف مش بتبطل ليه وواجع قلبي معك؟
عارف هتبطل أمتى؟
لما تحس إنك عجزت قوي...والصحة اتبعترت في الهواء.
روح كده مرة ألعب ماتش كورة...زي أيام زمان.
فاكر لما كنت بتقعد تتمنظر قصاد بنت الجيران وتجيب الكره بالكعب من وراء ضهرك...فاكر؟
لا المرة دي مش هيحصل كده خالص...المرة دي هتلاقي سكينة بتشق صدرك.
طب يا أخي مش بتصعب عليك نفسك وأنت طالع السلالم وعمال تنهج؟
عندكم أسانسير !
يا عم النور بيقطع أكتر ما بيجي...أنت هتشتغلنا !
طب تخيل كل التعب ده وأنت لسه في العشرين ولا الثلاثين.
أومال هتعمل إيه في الستين؟
هتتجوز تاني في الستين؟
ليه يا بني تعمل في نفسك كده...خليك في السجائر أرحم
طب فكر في النقاط دي كده.
أولا: روح أجري...أي والله روح أجري.
لا...مش تمشي...ولا تلعب كمال أجسام وشوية حديد.
أطلع أجري.
أجري من قدامي الساعة دي !
لا حقيقي...دقيقتين وهتلاقي نفسك قصاد المشكلة والكحة والبلغم والنفس المقطوع.
حاجة تكسف بصراحة.
ثانيا: فكر في مصاريفك كده.
أنت عارف لو بتشرب علبة سجائر واحدة في اليوم...هتوفر في الشهر 300 جنية...ده على اعتبار إنك بتشرب كوكو الضعيف.
جمع شجرة وأكسب علبة ... !
يعني في السنة حوالي 3600...عمرك أتزنقت في مبلغ زي ده واستلفته...علشان داخلة مدارس ولا مصيف؟
طب مش السلف ده حاجة وحشة؟
طب ما هو في إيدك المبلغ ... وعمال يتسرسب !
أنت غني ومش فارقة معك.
طب تخيل بقى حجم الحسنات اللي هتاخودها لو طلعت المبلغ ده للناس الغلابة.
ثالثا: تعرف إن السجائر مع الكرش هما الثنائي القاتل للقدرة الجنسية.
نقطة ومن أول السطر !
رابعا: تصدق إنك ممكن تبقى سبب في إن طفل يدخن ويتأذي !
ويطلع طول عمره بيعاني زيك من التدخين!
مش مشكلتك لوحدك للعلم.
طب حاول تدخن في مكان ما فيش فيه أطفال.
أرحمهم يا أخي...مالهومش ذنب والله.
عارف لو حسيت النقطة دي...هتلاقي نفسك بتستخبى كل مرة تدخن. وبعدين هتزهق وتفكر تبطل.
خامسا: يا أخي قال رسول الله صلى الله عليه وسلم:
لَا تَزُولُ قَدَمَا عَبْدٍ يَوْمَ الْقِيَامَةِ حَتَّى يُسْأَلَ عَنْ أَرْبَعِ خِصَالٍ :
عَنْ عُمُرِهِ ، فِيمَ أَفْنَاهُ ؟
وعَنْ شَبَابِهِ ، فِيمَ أَبْلَاهُ ؟
وَعَنْ مَالِهِ ، مِنْ أَيْنَ ؟ وَفِيمَ أَنْفَقَهُ ؟
وَعَنْ عِلْمِهِ ، مَاذَا عَمِلَ فِيهِ ؟
شوف السجائر هتضيعك في كام نقطة من اللي في الحديث ده؟
عدهم أنت بنفسك علشان تعرف حجم المشكلة !
وغيره كتير...وكتير...
طب لما تفكر في الكلام ده كده وعايز تبطل تعمل إيه؟
أنا هقولك خطوات بسيطة ومتجربة.
أصعب حاجة هي أول يومين زي موضوع الدايت بالظبط.
في اليومين دول محتاج تعمل شوية الحاجات اللي جاية:
أولا: تبعد كل البعد عن الناس اللي بتدخن.
خود أجازة من كل الأصحاب...خصوصا لوكو.
ممكن تبتدي التبطيل في أجازة نهاية الأسبوع وما تخرجش.
وإن كان الأفضل إنك تبدأ أول ما تقرر...ما تستناش لبكره.
يا عم الأخت ناريمان هتقدر.
قولها بس أنا ببطل سجائر....وهي هتزغرط.
بس يا ويلك بقى لو ما بطلتش بعدها...هيبقى العقاب من نار !
ضيعت الأجازة علينا ورجعت تاني للهبابة دي...طاخ طوخ طيخ !
ثانيا: نام كتير في اليومين دول.
على مزاجك الحتة دي ... مش كده ؟!
ثالثا: أشرب عصائر كتير...خصوصا البرتقال والليمون...فيتامين سي مفيد قوي في القصة دي.
رابعا: ما تاكولش أكل دسم خالص.
معلهش يا أستاذة ناريمان حاولي بس مع الرجل اليومين دول.
بلاش أكل دسم علشان خاطر مستقبل الأسرة.
ويا سلام لو تبدأ مع الطلعة دي ... طلعة دايت.
لأن المعدة لما تبقى فاضية هتخليك قرفان من طعم السيجارة.
اللي هي طعمها مقرف أساسا...بس القرف هيزيد بقى ومعدتك فاضية.
تقدر تراجع المقال بتاع الدايت.
خامسا وده الأهم: أبعد عن المنبهات.
لا مش المنبة اللي بيصحيك للشغل.
بنتكلم في الشاي والقهوة. معلهش خفف منهم.
مش قادر...؟
طب أشرب الشاي خفيف...وبلاش قهوة علشان خاطري.
هي عادة أصلها.
لازم تكسر الدائرة الجهنمية دي.
هتشرب شاي عايز السيجارة.
هتشرب قهوة عايز السيجارة.
تاكل دسم...لازم تحبس بالسيجارة.
أجمد يومين...وصدقني الموضوع هينتهي...بإذن الله.
إيه بتقول إيه؟
زعلان إن علاقتك بعم حسنين بتاع الكشك هتبوظ؟
يا عم أبقى روح عنده واشتري نعناع ولبان.
أوعى تروح وتضعف وتشتري سجائر.
خلي رجلك تتعود لو راحت هناك تشتري شيكولاتة...عصير...حاجة ساقعة.
وبالمناسبة مهمه قوي حكاية إن يبقى معك حاجة تسليك.
حلويات...لب...سوداني. وخصوصا اللب.
وما تجبهوش متقشر...هاته بقشره وهو هيشغلك عن فكرة السجائر.
وللعلم الحاجة الساقعة رغم ضررها على الجسم.
بس لو شربتها مع السجائر هتحس إنك بتشرب يازول...أعوذو بالله.
عايز تقرف من السجائر...جربها مع البيبسي أو الكولا...يعععععع
سادسا: الرياضة ثم الرياضة ثم الرياضة.
خصوصا الجري.
سابعا: وكمان لما تبقى عايز تشرب سيجارة.
قاوم الشعور ده لدقيقة واحدة.
خود نفس هواء عميق وفكر في حاجة تانية.
قوم اوقف في البلكونة وشم هوا نقي.
هو صحيح ما فيش عندنا هواء نقي ... بس أقنع نفسك إنه هواء نقي.
الرغبة في السيجارة مش هتقعد أكتر من دقائق.
لو قاومتها هتعدي العملية.
أشغل نفسك بالأولاد... بالكلام مع الأستاذة ناريمان.
قوم أعمل معها طبق السلطة...أشغل نفسك.
ثامنا: إياك ثم إياك من الغضب والنرفزة في اليومين دول.
معلهش يا أستاذة ناريمان أجلي النكد يومين بس.
خلي الرجل ينجح في خطته...ما تقلقيش...بعد كده هتنكدي عليه براحتك.
"أنا زهقان.. يا عم اللي بتكتب ورايق وفايق أنت"
ما أنا مقدر زهقك.
بس مش هتبقى دنيا بايظة وصحة بايظة ومال ضايع.
صدقني لما تتحدى نفسك وتنجح...هتفرق معك في حاجات كتير.
هتلاقي نفسك مستعد تعمل أي حاجة بعد كده.
هتوصل لدرجة إنك ترفع عينك في زوجتك وتقولها:
أنا خارج يا حبيبتي بعد إذنك...تحبي أجيبلك حاجة من بره ؟!
جرب وتوكل على الله.
صدقني هتفرق معك قوي. وهتشوف دنيا تانية خالص.
بعدها هتبقى في وسط اللي بيدخنوا وتلاقيهم صعبانيين عليك.
علشان أنت هتدوق نعمة...كنت محروم منها.
عارف
مرة واحد صعب عليه قوي...كان داخل المسجد يصلي.
وكان للأسف بيدخن...وما حبش يدخل بعلبة السجائر المسجد.
حط العلبة في الجزمة وسابها برة.
هو غالبا هيطلع مش هيلاقي السجائر ولا الجزمة.
بس يا أخي ما ربنا اللي أنت داخل تصلي له في المسجد.
هو نفسه اللي في كل زمان وكل مكان.
ليه يديلك نعمة كبيرة زي الصحة...تقوم مضيعها في لا شئ؟
أحتسب كل سيجارة هتبطل وما تشربهاش بثواب.
طب لو جربت الكلام ده وفشلت
حاول تاني.
حاولت وزهقت.
حاول ثالث ورابع وخامس...ومليون.
يا أخي خليها مشكلتك اللي لازم تحلها.
ما تستسهلش...والله هتلاقي فرق كبير...وهتحمي نفسك من ابتلاء رهيب.
يا أخي أتعلم من الزمالكوية.
عمرك شوفتهم زهقوا؟
دائما قول لنفسك: الإقلاع عن التدخين قادم...قادم !
وبقولك بقى من الأخر: هتبطل ولا نجيبلك مرتضى؟!
وختاما لو الصورة الجاية دي ما فرقتش معك.
يبقى ما فيش كلام هيفرق معك.
دي صورة رئة مدخن ورئة غير مدخن ...ربنا يعافينا جميعا.
ده غير أمراض الدنيا كلها...تقريبا ما فيش مرض السجائر مش بتكون سبب فيه.
وأنصحك تدور على صور لمرضى التدخين...علشان تشوف إيه اللي بيحصل...ربنا يعافينا ويعافيك.
وفكر...لو حد جابلك صفيحة فيها بلك أسود...وقالك أشربها... هتشربها؟
زهقت من زوجتك...نفسك تجدد حياتك !
أنسف...
أنسف همومك يا عم...مش زوجتك.
طب زهقتي من بعلك...نفسك تنطلقي في الحياة.
الرجل كاتم على نفسك يا ختشي...تعالي معانا في رحلتنا النهاردة.
خليني بس اسألكم السؤال ده
وفكروا فيه على أما نوصل لنهاية المقال ده
أحنا بنتجوز ليه؟
بص يا سيدي.
عمرك سألت نفسك هو أنت ليه بتبقى سعيد مع أصحابك؟
ليه بتضحك من قلبك في الكافية؟
لكن في البيت بتبقى عامل فيها طائر الأيبس المتحنط؟
طب بقولك يا أستاذة؟
عمرك سألتي نفسك...ليه صاحبتك شاهيناز...أطيب وأرق من زوجك؟
القصة وما فيها إننا مش عارفين أحنا متجوزين ليه...زمبئلوكم كده.
يعني أقولك.
أنت صاحبك لوكو مثلا...ليه بتحبه قوي كده؟
علشان أنت مختارة على الفرازة...وعدى عليكم وقت طويل من الخبرات والمرجلة والمجدعة...ياما أضربنا مع بعض يا معلمي.
وياما دارا عليك في مواقف منيلة.
يعني هو الوحيد اللي بتتكلم معه وأنت مش خايف يفضحك ولا يعايرك ولا يقول عليك عبيط.
علطول هيقولك: ياخود عدوينك يا صاحبي.
سامعة يا ناريمان لوكو بيقول إيه وبيعمل إيه؟
طب خليني أسألكم كمان سؤال.
عمر مديرك يبقى صاحبك؟
بلاش كذب...هو فيه مدير يتصاحب...!
لا بجد.
ليه مديرك بيبقى أخر واحد في الشركة ممكن تصاحبه؟
أقولك أنا...علشان فيه بينكم حاجز...فيه بينكم وشوش خشب.
مع إن مديرك ده...في نفس الكافية في الترابيزة اللي وراك...قاعد مع أصحابه مسخسخ من الضحك وأخر فرفشة؟
طب أركن أنت شوية.
وصلنا لإيه يا ناريمان؟
برافو عليكي...لوكو صديق وفي وطيب...أمين...بيفدي صاحبه برقابته...ومحل أسراره...وعمره ما بيسخر منه !
طب والمدير؟
واحد حاطط حواجز ومخشب...رغم إنه إنسان طبيعي زينا.
طب إيه الحل؟
ما فيش حل خلاص...لازم تتطلقوا.
لا يا جدعان تعالوا...أنتوا ما صدقتم...أنا بهزر.
طيب يا جماعة هو أحنا بنتجوز علشان الجنس.
جزء مهم في العلاقة أكيد...بس مش هو العلاقة.
مفروض إنه وسيلة تزود الاتصال بين الأرواح.
طب بنتجوز علشان الأولاد.
من نعم ربنا طبعا...لكن إيه فائدة وجودهم لو خليتم عيشيتهم طين بالعلاقة البايظة اللي بينكم؟
طب أنتي متجوزة علشان تتفسحي يا ناريمان يا أختشي.
وتشتري لبس وتلطعي الرجل بالعشر ساعات على أما تلفي كل المحلات
وفي الأخر ما بتشتريش حاجة...ولو اشتريتي...تاني يوم تروحي ترجعيهم.
طب بنتجوز ليه؟
أقولكم أنا
بنتجوز علشان يبقى فيه بينا بعض مودة ورحمة.
يبقى فيه أرواح عايشة مع بعض في جنة أرضية.
عصفورين لهم عشهم الخاص...وسرهم الخاص.
لهم منطقتهم اللي ما بيدخلهاش غيرهم.
مش ناظر وطالب...مش مدير وموظف...مش ست هانم وسواق...مش أمير وجارية.
يعني الزوجة للزوج..والزوج للزوجة.
أكتر من صحوبية لوكو لصاحبه.
وأوعو حد يقرب من مستوي المدير الرخم السمج أبو وش خشب.
لازم تعرفوا إن إطلاق النار متبادل.
لا زوجك لسانه قصير...ولا زوجتك بوزها قصير.
يا عم أسكت.
دي تديلك بوز واحد بس....تقلب عليك عيشتك عشر سنين.
يعني يا جماعة...أنتم لازم تكونوا أصحاب.
طب ليه صاحبك لما بيقول نكته بتضحك....رغم أن النكتة ممكن تكون بايخة ؟!
فيه اختراع اسمه مجاملات...أي والله.
طب صاحبك لو رخم عليك
وقلبك مرة واتنين
مش بتفوت وتسامح؟
عارف ليه؟
علشان له عندك رصيد وكمان بتحبه بجد...مش عايز تخسره يعني !
طب يا ناريمان...مش صاحبتك شاهيناز بتغلط
مش ساعات بتبقى عصبية...مش ساعات بتبقى رخمة وبايخة.
وبتعيط بدون سبب زي المجانين؟
شاهيناز ما بتعملش ده كله؟
دي تبقى رجل وأنتي مش واخدة بالك يا ناريمان
لا بجد...أنتي لسه مصاحبها ليه؟
عارفة ليه؟
علشان أنت عارفة إنها بشر يا ناريمان
مش فارس أحلام...راكب حصانه الأبيض في أبيض.
والكلام اللي لحسوا دماغنا به.
فيه بينكم عيش وملح
وما فيش حد كامل يا ناريمان...وحبك لها...بيفلتر عيوبها.
علشان كان بينكم أيام بريئة مش مبنية على مصلحة.
كنتم بترجعوا من المدرسة إيديكم في إيد بعض.
وما فيش حد فيكم عايز حاجة من التاني.
طبعا ما يمنعش أنها كانت بتسرق سندوتشاتك.
طب مش كنتم بتقعدوا ممددين وباصين للسقف
وتحلموا بأحلام مشتركة.
عمرك بوزتي لشاهيناز...وقولتي لها عايزه أروح أصيف في بلطيم.
لا طبعا.
دائما بتقترحي وأنت بتتنططي زي الطفلة الصغيرة.
ممكن نروح بلطيم يا شاهي...؟
ألا حد يقعد يحلم علشان يروح بلطيم؟!
طب الوالد...مش أحسن حد في الدنيا؟
طب أحب أعملك مفاجأة.
الوالد مش لوحده أحسن حد في الدنيا...كل البهبهات كده لأولادهم...خصوصا عند البنات.
أهو زوجك لما بيبقى مع صاحبه لوكو...بيبقى حاسس إنه أحسن واحد في الدنيا.
لوكو بيعامله على أنه أفضل إنسان في الدنيا...وفي غيابه هيقول...صاحبي أفضل صاحب في الدنيا !
فيه بينهم عالم مشترك...عالم بتاعهم هم الاتنين بس !
عرفتوا بتتجوزوا بعض ليه؟
علشان بتحبوا بعض...علشان تشيلوا بعض...علشان تبقوا ضهر لبعض...علشان ما ينفعش تعيشوا من غير بعض !
هتقولوا لي نعمل إيه؟
بعد ده كله ولسه أقولكم تعملوا إيه؟
خلوني أقولكم المثل العظيم ده...ودي قاعدة عامة في مخاميخ:
لا تعطيني بيضة...ولكن علمني كيف أبيض ؟!
لا صحيح...اشتغلوا على العلاقة.
أعرفوا السكة للطرف التاني.
وأعرفوا إن الطريق رايح جاي...ما ينفعش الطريق يبقى في اتجاه واحد.
عارفين أهم حاجة تتعمل إيه؟
التسامح مع قليل من التطنيش.
مش قدماء المصريين قالوا...طنش تعيش تاكل قراقيش ؟!
طنشوا شوية يا جماعة...أنتوا مش بتربوا بعض من تاني.
والأهم
المصارحة والكلام بهدوء.
أعملوا ساعة كل أسبوع للكلام والمصارحة.
مش للتسبيل والتنهيد.
كل واحد يطلع اللي جواه ويحكي للتاني عن اللي مضايقه.
ما يفضلش كل واحد كاتم جواه ويروح ينفجر في وش التاني.
ويا ريت الساعة دي تبقى في مطعم جميل.
هو صحيح الرجل هيطلع بيلطم من الفاتورة...بس الأفضل تجتمعوا بره البيت.
ويا سلام بقى لو الطلعة من غير العيال.
سيبوا العيال عند نانا وجدو.
كلموا بعض يا جدعان.
عبروا عن اللي جواكم بهدوووووووووء وبحب.
ما تسيبوش المشاكل تكبر.
خلوا هدفكم الاستمرار والدفاع عن الكيان ده.
الستات بيحبوا الورد...هاتلها ورد يا سيدي
إيه؟ بتطبخ الورد؟
معلهش ...بكره تعرف إنه بيتشم !
يا عم قولها شعر...مش عارف...اقتبس:
الحب الحب...بلوبيف بلوبيف...من أخوكي اللمبي.
الكلمة الطيبة صدقة
يا سيدي حسسها إنها جميلة...يا عم حسسها إنها بتوحشك.
الست لو اتنططت قصادها وعملت قرد...بس ما نطقتش
مش هتعتبر أي حاجة حصلت.
أنطق واتكلم.
أعترف الإنكار مش هيفيد.
طب خود الوصفة دي:
قبل ما تفتح باب البيت...غمض عينك...خود نفس وسمي الله.
فتح عينك...أدخل البيت وقول السلام عليكم.
أول ما تشوفها...خودها بالحضن...وقولها وحشتيني قوي يا روحي.
صدقني هتاكل غدوة....عمرك ما كلتها قبل كده...جرب بس !
والغالي عندك يا ناريمان
أول ما يقولك وحشتيني يا حبيبتي...بلاش تقولي له:
الأنبوبة فاضية يا حبيبي.
قولي له:
وأنت كمان وحشتني يا حبيبي.
وبعد ما يغير هدومه ويلقط نفسه.
خوشي عليه بكسوف وقولي له:
عندي حاجة عايزه أقولها لك يا حبيبي بس خايفه أضايقك.
هتلاقيه طائر وبيقولك: قولي يا حياتي.
قولي له: الأنبوبة
واسكتي بقى.
أوعي تقولي فاضية...خليها تيجي منه.
اسمعي كلامي بس.
يا ستي حسسي جوزك إنه أفضل إنسان في الدنيا.
لما تبقوا في البيت...أقعدي جنبه من غير ما تتكلمي.
حسسيه بس إنك عايزه تبقى جنبه.
ولما تحسي إنه زهقان واسيه.
طب قرفان ومتعفرت...سيبيه شوية وهو هيهدى.
ما هو مش أنتي والمدير عليه يا ناريمان.
لما طرف يتكلم...الطرف التاني يسمع.
ما يخرجش عن السياق...غير لما اللي بدأ الكلام يخلص.
يقول على مشاكله...تفاعل معه.
مش واحد بيتكلم في ماتش الزمالك اللي نكد عليه.
والطرف التاني يتكلم عن جزر المالديف.
وكمان لو زعلتوا وجيه يصالحك
وجاب ورد..شيكولاته...حاجة ساقعة حجم الصاروخ.
بلاش تديلوا في جنابه.
عمره ما هيقدر يعمل الحركة دي تاني.
كل ما هيشوف الورد هيحس إنه ساذج وعبيط.
وهيروح يجيب سندوتشين بثمن الورد.
أهم حاجة...والغالي عندك.
بلاش تستني يحصل زي أغاني الفيديو كليب.
مش هتصحي من النوم أصلك تلاقيه ماسك جيتار وحاطط في وردك شعرة...قصدي حاطط في شعرك وردة.
الرجل شقيان وكرشه مش هيساعده يمسك الجيتار.
أنا بحاول أخليه يخس في المقال اللي فات.
وغالبا المقال اللي جاي عن التدخين.
هظبطهولك.
أتقلي معايا بس يا ناريمان.
خلينا ننجح يا أختشي...قطيعة ما حدش بياكولها بالساهل !
فكروا يا جماعة واشتغلوا على العلاقة شوية.
وأهم حاجة خلونا نحتفظ بأدميتنا.
واسمع كلام الأجانب.
زوجة سعيدة = حياة سعيدة.
هم بيتجوزوا أصلا ولاد الكذابة؟!
واللي بيتجوز فيهم بيبقى شاف أشكال وألوان
ولما اتهد وعايز يعيش بقى...يقعد يتفلسف على أهلنا.
بس معلهش عديها ونفذ أنت.
خود الحكمة من الكلام.
والأهم خلونا نسعى لتحقيق الآية دي:
وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا
لِتَسْكُنُوا إِلَيْهَا
وَجَعَلَ بَيْنَكُمْ مَوَدَّةً وَرَحْمَةً ۚ
إِنَّ فِي ذَٰلِكَ لَآيَاتٍ لِقَوْمٍ يَتَفَكَّرُونَ
من أنفسكم يا جدعان...كان يقدر يخلقهم من غير ما يكونوا منكم !
وأخيرا
إيه رأيكم نجوز لوكو لشاهيناز؟
علشان الاتنين يقعدوا يدعوا علينا ! :D
طيب يا جماعة أنا قررت أساهم في إقرار السلام في العالم كله.
وهقولكم برنامجي الغذائي اللي هيحولك من أسد عجوز شرس وبكرش...إلى غزال شاب رشيق ووديع.
وطبعا لازم تراجعوا الطبيب علشان تتأكدوا إنه ينفعكم.
من المفروض الوجبات عددها يزيد وكمياتها تقل...
يعني خمسة أو ستة بدل ثلاثة...
بس كل واجبة أصغر في الحجم.
والأهم من ده كله هو
الحركة والرياضة...
وما فيش اي أكل بعد المغرب...
ولو جوعت قوي بالليل...أديها جزرتين ثلاثة من اللي كوكي وميمي بيسموه بيبي جزر...
اللي هو لا يغني ولا يسمن من جوع ده...أيون...الجزر الكبير بيزهق أصله...
الفكرة كلها عبارة عن شوية سعرات الجسم محتاجها...ولو أخد أكتر منها...وما عرفش يحرقها...هيحولها لسيادتك رصيد...والرصيد ده عبارة عن دهون.
عايزك بقى تجيب عدسة مكبرة وتقعد تشوف كل عبوة فيها سعرات حرارية أد إيه...؟
قفشتك يا مجرم...سعر برئ ماشي في حاله...تاكله ليه؟!
من الفنيات:
استبدال اللبن كامل الدسم...باللبن المنزوع الدسم...أو لبن اللوز.
الموز والجزر والخس والسلطة دول رفقاء السلاح من أول لحظة تخسيس.
من الأسرار الفنية العظيمة:
الفاصوليا السوداء...لو ما لقتش خوش على الفاصوليا البيضا.
طبعا تتاكل مسلوقة مش مطبوخة...وممكن تعصر عليها شوية ليمون وتديها شوية بهارات في اللذيذ.
وأنا ساعات بحط عليه سنة زيت زيتون وسنة خل.
وجبة هتشبعك وسعراتها مش عالية...أو أنا يمكن بفتي بكده
الوجبة الرئيسية...اللي هتفضل تزحف طول اليوم لحد ما توصل لها:
هتبقى غالبا طبق سلطة كبيرررررررررر !
مع التونة اللي هي بالماء...أو صدور الفراخ مسلوقة منزوعة الجلد طبعا...
ما هو مش هتبقى بتعمل دايت وتاكل الجلد...مش محتاجة مفهومية دي؟!
وفي السلطة خلي حبيبك عيش الغراب ضيف في السلطة...وطماطم بقى وطرنشات خيار وخس وحركات...
عايزك زي ما تكون قصادك بوصة وبتحاول تخليها عروسة.
واللي جاي هي أهم نقطة هتعجبك في البرنامج وهي:
إن لازم يكون فيه يوم أكل بدون قيود في الأسبوع.
تاكل فيه كل حاجة ولو حتى آيس كريم وبيتزا وبورجر..
عايزك تطلع من اليوم ده خسران كل اللي خسيته في الأسبوع...
عايزهم يشحنوك من محلات الأكل السريع على السرايا الصفرا...
أوعى تديهم فرصة يضيعوا عليك اليوم ده يا مسكين.
كُل يا مليجي يا جامد...ولو ضرب عليك النار...كُل برضو...
لا بجد اليوم ده مهم جدا في خداع الجسم...
خليني أقولك المعلومة الأي كلام دي...
وهي إن الجسم ممكن يضحي بالعضلات...قبل ما يضحي بالدهون... !
أيون...لأن الدهون دي هي القرشين اللي محوشهم الجسم لوقت عوزة...وما يضحيش بهم بالساهل.
فأنت كل ما توصل لليوم الفري ده...أديلوا بكرم...فيحس إنك مش بتخسس ولا حاجة...وهيأمنك ويسلمك الدهون.
تقوم واخده شنكل حرامية وداخل على الأيام العادية مع الدايت...
إلهي ما يرجعها أيام...
حاول تقلل من اللحوم الحمراء...علشان نسبة الدهون فيها عالية...استبدلها بصدور الفراخ والسمك خصوصا التونة...
هتلاقي نتائج أفضل.
طبعا ما فيش نشويات ولا مخبوزات...
ياني يا أختي يا اللي هموت وأنا بخسس يا أختي.
يعني رغيف عيش في اليوم فلة جدا...ويتقسم على نصين...
كل نص يتحشر في وجبة مسكينة.
ويا سلام لو رغيف عيش بتاع تخسيس كمان.
وطبعا لا للسكريات...
خصوصا الشيكولاتة والحلويات والعصير اللي مش طبيعي.
دول أعداءك أوعى تسيبهم يضحكوا عليك يا قناوي يا بني...
دول عمرهم ما هيجوزوك هانومه...
البنت هتطير يا قناوي ...
اشتغل يا بني شوية خليها ترجع تلاقيك وراء الشحوم دي...
بس خود بالك قوي بقى من السكر اللي في الشاي والنسكافية...دي كمية من السعرات تكفي تخليك فيل صغير...ممكن تقلل على أد ما تقدر والأفضل لو تبطل...
طب ما ينفعش...حاول تخوش بقى على بدائل السكر اللي هي زي سبليندا والكلام ده...بس أقرا علشان تشوف لو له تأثير على صحتك ولا لا.
وممكن تستبدل البكش ده كله بعسل النحل الحقيقي...مش المضروب !
بس ما تكترش قوي في العسل لأن المعلقة الواحدة فيها حوالي 60 سعر حراري !
وإن كانوا بيقولوا إن العسل من السعرات اللي بتتحرق بسهولة...بس عموما خلي القاعدة بتاعتك...الصابع اللي يتعبك أقطعه...!
والنصيحة الأخيرة:
بعد ما توصل للهدف المطلوب...وتخس وتفرح بنفسك في المراية...
وتبقى وسط صحابك...اللي هيقعدوا يقولولك...شايفين كرشك راح...وكرشنا لسه كبير !
تقدر ساعتها تقلب البرنامج بقى وتديها سكريات وحلويات وخلافه
لحد ما ترجع كل اللي فاتك
لا يا عم بهزر...
أهم حاجة في التخسيس مش إنك توصل للهدف بس ...وتخس.
الأهم إنك تغير نظام حياتك...
عمرك ما هتفلح طول ما أنت بتسهر بالليل لحد الفجر وعمال تاكل.
لازم تصلح يومك
تصلي العشاء وتنام...وبعدين تصحى تصلى الفجر وتبدأ يومك بنشاط...
وتستمر في تقليل الحاجات اللي بتخن...وبتأذي الصحة.
خصوصا السموم البيضاء...السكر والدقيق.
وخليك في المسلوق والمشوي بدل المقلي.
وأهم حاجة انتظم في الرياضة...أو على الأقل المشي...
يعني أركن العربية بعيد شوية وأنزل أمشي لحد البيت...
أو حتة كوماندوز وأنت نازل من الميكروباص ودحرجة لحد ما توصل للبيت.
وأفتكر وأنت بتبتدي...
إن أصعب فترة هي أول يومين...
بعدها المعدة بتتعود وشهيتك بتقل...وبتتعود على طعم الكلوروفيل اللي هيملى حياتك...بس صدقني النتائج هتبقى مبهرة.
أوعى تضعف في أول يومين.
وخلي عندك ميزان وسجل الوزن....مهم قوي...
ويا سلام لو تاخود مقاسات الكرش علشان تعرف وصلت لفين.
وما تقوليش مش هقدر...ومش عارف إيه...شوف الحديث اللي جاي:
قالت عائشة رضي الله عنها لعروة بن الزبير:
كان يمر الهلال تلو الهلال تلو الهلال ثلاثة أهلة في شهرين ولا يوقد في بيوت رسول الله صلى الله عليه وسلم نار.
قال: فما كان طعامكم يا خالة؟
قالت: الأسودان التمر والماء.
بلاش دلع بقى وركز عايزينك في الأوليمبيات اللي جاية يا بطل !
اتقدم...اتقدم...وكفاية خلاص تتندم...
للخس...للجزر...
للخس...للجزر...
مش هتعطلنا كروش ... !
